A do të vendosë sot Qeveria e Zvicrës për zbutje të mëtejme të masave

Në modelin 3-fazor, Zvicra është ende në fazën 2, që është quajtur faza e stabilizimit. A do të shpallet sot faza e tretë, ajo e normalizimit?

Qeveria e Zvicrës është mbledhur sot në takimin e parë pas pushimit të verës. Në këtë takim, ajo, ndër të tjera, do të merret me rrjedhën e mëtejshme të veprimit në lidhje me krizën e koronës, shkruan srf.ch.

Në mediat zvicerane flitet shumë për këtë mbledhje, por megjithatë, është konstatim i përbashkët se nga ajo nuk pritet ndonjë lehtësim i mëtejshëm i masave.

Siç dihet, në një model prej tri fazash të prezantuar muaj më parë, qeveria parashihte që në këtë kohë të vihej në fuqi faza e tretë, ajo e normalizimit, transmeton albinfo.ch. Kjo do të nënkuptonte heqjen e (pothuajse) të gjitha masave mbrojtëse.

Në fund të korrikut, ministri i Shëndetësisë, Alain Berset, ka hequr dorë nga konsultimi i kantoneve lidhur me fazën e tretë. Kjo ka ndodhur për shkak të zhvillimeve të pasigurta pas përhapjes së variantit Delta.

Në modelin 3-fazor, Zvicra aktualisht është ende në fazën 2, që është quajtur faza e stabilizimit.

Një temë tjetër në mbledhjen e sotme mund të jetë ajo për testet falas, transmeton albinfo.ch. Presidenti Federal Guy Parmelin kohët e fundit e kishte vënë në pikëpyetje këtë në një intervistë.

Nga ana tjetër, ministri Berset është shprehur se testet duhet ofruar falas, së paku edhe për disa javë.

Vendimet eventuale të qeverisë do të bëhen të njohura në orët e pasdites së sotme.

---