A do të rishikojë Zvicra “ofertën” pas goditjes me tarifa nga SHBA-të

(KEYSTONE/Anthony Anex)

Ministri zviceran i Ekonomisë, Guy Parmelin, e përshkroi si të papritur dhe “ndëshkuese” vendimin e Donald Trump për vendosjen e tarifave 39% mbi importet nga Zvicra. Qeveria në Bernë pritet të shqyrtojë me urgjencë një riformulim të ofertës së saj tregtare ndaj Uashingtonit.

“Po përpiqemi të kuptojmë se çfarë ka munguar,” u shpreh Parmelin për radion publike frankofone RTS të shtunën, një ditë pas shpalljes së tarifave nga SHBA-të.

Megjithatë, ai shprehu besimin se vendimi mund të kthehet mbrapsht. “Këshilli Federal mund të mblidhet në çdo moment, fizikisht ose virtualisht, dhe shumë shpejt do të analizojmë çfarë e shtyu Presidentin amerikan në këtë hap,” theksoi ai, transmeton albinfo.ch.

“Do të bëjmë gjithçka për të treguar vullnetin tonë të mirë dhe për të rishikuar ofertën,” shtoi Parmelin, duke lënë të kuptohet se zhvillimet e reja priten që në fillim të javës.