Plagosen rëndë me thikë dy kosovarë, roje sigurie, në Lucern

Dy rojet e sigurisë janë 33 dhe 40 vjeç dhe vijnë nga Kosova. Policia ka arrestuar të dielën herët në mëngjes një person të dyshuar

Dy roje sigurie të angazhuar nga zinxhiri i ushqimit të shpejtë Burger King janë plagosur rëndë nga një mysafir gjatë një zënke në qytetin e Lucernit mbrëmjen e së dielës, transmeton albinfo.ch

Dy personat kanë pësuar plagë me thikë dhe prerje dhe duhej të operoheshin në spital. Akti ka ndodhur pak pas mesnate në Zentralstrasse, sipas zyrës së prokurorit publik të Lucernit. Autori është larguar në drejtim të panjohur.

Policia ka arrestuar të dielën herët në mëngjes një person në një apartament në qytetin e Lucernit shkruan Luzerner Zeitung. I arrestuari është një 47-vjeçar amerikan, banues në Zvicër. Por policia nuk ka mundur akoma të konstatojë nëse është fjala për sulmuesin ose jo.

Dy rojet e sigurisë janë 33 dhe 40 vjeç dhe vijnë nga Kosova. Aktualisht po përcaktohen rrethanat e sakta të krimit, përcjell albinfo.ch. Rruga qendrore është dashur të mbyllet për rreth dy orë e gjysmë për shkak të incidentit.

Policia e Lucernit kërkon ndihmë dhe dëshmitarë: Kush ka mundur të vëzhgojë drejtpërdrejt konfliktin mes tre personave? Kush ka vëzhguar arratisjen e autorit të dyshuar? Dëshmitarëve u kërkohet të telefonojnë në numrin 041 248 81 17.

---