OKB: Më shumë se 100 milionë njerëz të zhvendosur me forcë nëpër botë

(KEYSTONE/Jean-Christophe Bott)

Më shumë se 100 milionë njerëz janë dëbuar nga shtëpitë e tyre në mbarë botën, tha të hënën Agjencia e OKB-së për refugjatët (UNHCR), duke cituar të dhëna të reja për ata që i shpëtojnë dhunës, konfliktit, persekutimit dhe shkeljeve të të drejtave të njeriut, transmeton albinfo.ch.

Lufta në Ukrainë ka qenë një nga faktorët që ka shtyrë miliona njerëz të largohen, tha UNHCR, duke shtuar se konflikti i zgjatur në vende si Etiopia dhe Republika Demokratike e Kongos ishin faktorë të tjerë pas shifrave të larta.

“Është një rekord që nuk duhet të ishte vendosur kurrë”, tha Komisioneri i Lartë i OKB-së për Refugjatët, Filippo Grandi, në një deklaratë dërguar gazetarëve.

“Kjo duhet të shërbejë si një thirrje zgjimi për të zgjidhur dhe parandaluar konfliktet shkatërruese, për t’i dhënë fund persekutimit dhe për të adresuar shkaqet themelore që detyrojnë njerëzit e pafajshëm të largohen nga shtëpitë e tyre”.

Të dhënat e UNHCR-së përfshijnë refugjatët, azilkërkuesit dhe ata të zhvendosur brenda vendeve të tyre. Javën e kaluar, një organ humanitar tha se të zhvendosurit brenda vendeve të tyre kishin arritur një rekord prej afro 60 milionë njerëz deri në fund të vitit të kaluar, transmeton tutje albinfo.ch.