Austria kërkon informacione për 3 shtetas të Maqedonisë Veriore

Detaje tjera në lidhje me sulmin e tmerrshëm që ndodhi dje në kryeqytetin austriak

Ministria e Punëve të Brendshme e Maqedonisë Veriore ka informuar se autoritetet austriake kanë kërkuar bashkëpunim për zbardhjen e sulmit terrorist që ka ndodhur mbrëmjen e djeshme në Vjenë.

Nga lista që autoritetet austriake kanë dorëzuar në MPB, është konstatuar se tre të përfshirë në sulmin terrorist, përveç shtetësisë austriake, kanë edhe shtetësi maqedonase, respektivisht bëhet fjalë për personat K.F. (i lindur në Modling të Austrisë), A.G. (i lindur në Shën Polten të Austrisë) si dhe U.A. (i lindur në Vjenë të Austrisë), shkruajnë mediat shqiptare në Maqedoninë e Veriut, përcjell albinfo.ch.

Ministri i Brendshëm austriak, Karl Nehammer, ka thënë të martën se të dhënat e mbledhura deri më tani nuk japin shenja se ka qenë edhe një sulmues i dytë i përfshirë në sulmin në Vjenë.

Ai ka thënë se video-incizimet e ofruara, nuk kanë dhënë detaje për një sulmues të dytë, ndonëse ende kjo gjë nuk është përfundimtare.

Një 20-vjeçar me shtetësi austriake dhe maqedonase, që është qëlluar për vdekje nga policia pak minuta pas sulmit të nisur të hënën në mbrëmje, është identifikuar si sulmues, në atë që autoritetet kanë thënë se ka qenë sulm ekstremist islamik.

Katër persona kanë vdekur si pasojë e të shtënave. Nehammer ka thënë se numri i personave të plagosur është rritur në 22. Ai ka thënë se 14 persona të lidhur me sulmuesin janë ndaluar për t’i marrë në pyetje përgjatë kërkimeve në 18 prona në dhe afër Vjenës.

---