592 libra shqip për nxënësit shqiptarë në Austri

592 tekste shkollore dhe plotësuese të paracaktuara për mësimdhënien e gjuhës dhe kulturës shqiptare janë dërguar falas nga Qendra e Botimeve për Diasporën në Austri, raporton albinfo.ch.

Tekstet janë dorëzuar tashmë te mësuesit e shkollave shqipe atje, pikërisht në kohën e duhur për fillimin e vitit të ri shkollor 2020-2021.

Librat iu dorëzuan kryetares së SHMSH-së “Naim Frashëri“, Miradije Berishaj, dhe një grupi mësuesish të gjuhës e kulturës shqiptare në Austri nga ambasadori i Republikës se Shqipërisë në Vjenë, Dr. Roland Bimo.

“Ka tekste të ndryshme shkollore, tekste cilësore që kanë shenjuar letërsinë shqipe, seria më e re e botimeve dygjuhëshe nga Qendra e Botimeve për Diasporën, një sërë vlerash, materialesh të ndryshme didaktike, akses online të botimeve dhe të platformës së mësimit shqip “Schoolme”, bën të ditur Qendra e botimeve për diasporën, transmeton Albinfo.ch

Ky material, sipas tyre, do të jetë tashmë në dispozicion të mësuesve për mësimin e gjuhës dhe kulturës shqiptare në Diasporë.

Materiali është dērguar në Austri nën kujdesin e veçantë të Ministrit të Shtetit për Diasporën dhe të mbërritur përmes MEPJ-së e Postës Shqiptare në Ambasadën e Republikës së Shqipërisë në Vjenë.