A do të fillojë mësimi në shkolla në Kosovë?

Institucionet shkollore në Kosovë janë mbyllur nga data 12 mars, pas masave që kishte marrë Qeveria e Kosovës për parandalimin e përhapjes së koronavirusit

Ministria e Arsimit dhe Shkencës në Kosovë, ka hartuar një plan, i cili parasheh që fillimi i vitit të ri shkollor të nis në tri faza, më datë 1 shtator, 7 shtator dhe grupi tjetër më 10 shtator.

Ministri i Arsimit, Ramë Likaj, tha se plani për fillimin e vitit të ri shkollor është përgatitur duke respektuar masat mbrojtëse kundër COVID-19.

Gatishmëria e drejtorive komunale të arsimit, sipas tij, është që nxënësit mësimin më 1 shtator të fillojnë në objektet e shkollave.

Ministri Likaj, po ashtu kërkoi buxhet shtesë nga Qeveria e Kosovës në mënyrë që përgatitjet për fillimin e mësimit të organizohen në mënyrën e duhur, shkruajnë mediat kosovare, përcjell albinfo.ch.

Kryeministri i Republikës se Kosovës, Avdullah Hoti, ndërkaq ka treguar mbështetjen e qeverisë sa i përket buxhetit të nevojshëm.

“Ju e dini se në Pakon për Rimëkëmbje Ekonomike, kemi ndarë 10 milionë euro për fushën e arsimit, 10 milionë euro tjera shtesë kemi ndarë për komunat për çështjen e menaxhimit COVID-19 edhe për fushën e arsimit. Komunat kanë në dispozicion edhe një shumë prej 29 milionë euro shtesë, që mund të përdoren për këto qëllime në rast se e shohin të nevojshme” tha Hoti.

Kurse, ministri Likaj shtoi se janë konsultuar me Drejtorinë Komunale të Arsimit dhe ata janë shprehur të gatshëm që mësimi të fillojë në objekte shkollore.

Gjithashtu, ai tha se kanë hartuar një vendim që mësimi të fillojë në tri grupe.

Ministria e Arsimit dhe Shkencës ka kërkuar nga Qeveria e Kosovës, që të mundësojë angazhimin e 1,000 mësimdhënëseve me pagesë për vitin e ri shkollor, që pritet të fillojë më 1 shtator.

Angazhimi i këtyre mësimdhënësve, sipas zyrtarëve të kësaj ministrie, duhet të vlejë vetëm gjatë kohës së pandemisë së koronavirusit.

Institucionet shkollore në Kosovë janë mbyllur nga data 12 mars, pas masave që kishte marrë Qeveria e Kosovës për parandalimin e përhapjes së koronavirusit.

Pastaj, Ministria e Arsimit vendosi që mësimi të vazhdojë nga distancë. Për klasat 1-9, mësimi është realizuar nëpërmjet transmetimit të mësimeve të regjistruara në televizionin publik, si dhe përmes kanalit të Ministrisë së Arsimit në YouTube.

Ndërsa në nivel të shkollave të mesme të larta, mësimi në distancë është zhvilluar në mënyrë të decentralizuar, ku mësimdhënësit ishin bartësit kryesore.

---