Dy ngjarje të rënda brenda pak ditësh kanë tronditur Gjilanin, ku tre persona kanë humbur jetën në rrethana të dhunshme. Rastet kanë rikthyer shqetësimin për sigurinë dhe përmasat e dhunës në Kosovë, ku nga janari deri në shtator të këtij viti janë regjistruar 17 raste të vrasjeve, përcjell albinfo.ch.
Rasti i parë ndodhi të premten në Livoç të Ulët, ku një burrë dyshohet se vrau bashkëshorten dhe vëllain e saj. Pas ngjarjes, i dyshuari u dorëzua në polici, ndërsa ndaj tij është caktuar masa e paraburgimit prej 30 ditësh.
Vetëm dy ditë më vonë, të dielën, një tjetër rast i rëndë u raportua në fshatin Pogragjë të Gjilanit. Atje, një baba dyshohet se i mori jetën djalit të tij. Sipas të dhënave të bëra publike, i dyshuari ndodhet ende në arrati.
17 raste të vrasjeve në nëntë muaj
Sipas statistikave të Policisë së Kosovës, nga janari deri në shtator janë evidentuar gjithsej 17 raste të vrasjeve. Prej tyre, 12 janë cilësuar si vrasje të rënda, ndërsa dy raste janë klasifikuar si vrasje nga pakujdesia.
Shifra është e njëjtë me numrin e përgjithshëm të vrasjeve të regjistruara gjatë gjithë vitit 2025. Kjo do të thotë se në nëntë muajt e parë të këtij viti është arritur i njëjti numër rastesh si në të gjithë vitin paraprak.
Ngjarjet e fundit në Gjilan e bëjnë edhe më të dukshëm shqetësimin për pasojat e dhunës, veçanërisht në rastet kur ajo ndodh brenda familjes.
Parandalimi i konflikteve që mund të përshkallëzohen në dhunë, reagimi me kohë i institucioneve dhe adresimi i situatave të rrezikshme mbeten sfida të rëndësishme për shoqërinë dhe autoritetet në Kosovë. /Albinfo.ch
