Kufizohet “e drejta emergjente” e Qeverisë Federale

Parlamenti Federal ka ndryshuar ligjin, duke i kufizuar qeverisë lirinë e veprimit në raste emergjente

Një sërë rastesh kur Qeveria Federale ishte e detyruar të merrte vendime në situata emergjente, pa pritur vendimin përkatës të parlamentit, kanë shkaktuar nevojën për ndryshime të rregullave të veprimit të qeverisë. Për këtë arsye, siç shkruan 20 Minuten, Parlamenti Federal ka ndryshuar ligjin, duke i kufizuar qeverisë lirinë e veprimit në raste emergjente.

Qeveria edhe më tutje do të ketë të drejtë të marrë vendime në situata emergjente, pa pritur qëndrimin e parlamentit, por ajo duhet që brenda 24 orëve të informojë komisionin parlamentar për kontroll të punëve të qeverisë lidhur me vendimin. Qeveria detyrohet që më së voni gjashtë muaj pas vendimit të ofrojë bazën ligjore për vendimin e marrë.

Në rast se Qeveria Federale vendos të derdhë mjete materiale për një rast emergjent ajo mund ta bëjë këtë edhe pa pritur miratimin e parlamentit por duhet të konsultohet paraprakisht me komisionin financiar.