Besniku, në finalen e supertalenteve të Gjermanisë

Ai ka kënduar këngën “Someone like you” të këngëtares Adele me të cilën i ka nxjerrë lotët anëtares së jurisë, Dana Schweiger

Sërish një shqiptar i suksesshëm në spektaklet gjermane të këngës. Pas Ardian Bujupit, Vanesa Krasniqit dhe të tjerëve, është djaloshi simpatik 12 vjeçar, Besnik Tërnava, që ngjitet lartë në garat për super yllin e muzikës në Gjermani. Kësaj radhe është fjala për garën DSDS Kids, pra për konkurrencën e fëmijëve, ku Besniku ka siguruar sonte pjesëmarrjen në finalen që mbahet më 25 maj.

Përveç tij, për finale janë kualifikuar edhe Timmy dhe vogëlushja Alyhsa.

Në paraqitjen e sontme që e ka transmetuar televizioni  RTL, vogëlushi shqiptar ka fascinuar jurinë me zërin e tij të kristaltë dhe interpretimin bindës. Ai ka kënduar këngën “Someone like you” të këngëtares Adele me të cilën i ka nxjerrë lotët anëtares së jurisë, Dana Schweiger. Edhe veterani i pop muzikës, anëtari tjetër i jurisë, Dieter Bohlen ka folur vetëm fjalë të zgjedhura për kandidatin shqiptar.

Besniku është prezantuar në spektaklin e RTL si shqiptar me prejkartdhje nga Kosova, i lindur në Gjermani. Ai ka thënë se me dëshirë i kalon pushimet në Kosovë, te të afërmit e tij. Në fund Besniku, duke u drejtuar nga kamerat  me duart e tij ka bërë shqiponjën, shenjë kjo e identifikimit të tij me bashkëkombësit, të cilët, krahas të tjerëve, do ta ndihmojnë në finale.

http://www.rtl.de/cms/index.html