Zvicerani u sjell ujë Kosove “300 mijë shqiptarëve të Zvicrës”

E veçanta e këtij importi në Zvicër është komponenti humanitar. Nga çdo shishe e ujit cilësor që shitet këtu, ndahen 5 rapi (centë) për shtëpitë e fëmijëve SOS Kinderdorf në Kosovë

Quellenangabe: "obs/Spirit of Drini (Schweiz) Vertriebs GmbH"

Të importosh ujë për pije nga Kosova në një vend me kaq shumë ujëra siç është Zvicra! A nuk është ky një guxim pak si shumë i madh ky? Jo, aspak, thotë importuesi, zvicerani Bernard Fanger, menaxher i një firme start-up. “Fundja 50 për qind të ujit që shitet në Zvicër vjen nga importi. Dhe, krejt çfarë kam bërë unë, kam hyrë në këtë 50%”, sqaron ai.

Nga kjo javë, në Zvicër mund të blihet edhe ujë mineral nga Alpet e Kosovës, me emrin “Spirit of Drini” (shpirti ose fryma e Drinit). Kështu shkruan e përditshmja e Zvicrës Blick am Abend e cila ka bërë edhe një intervistë me importuesin.

“Ujë nga vendlindja për 300 mijë kosovarët”, i ka vendosur titullin këtij artikulli gazeta e përmendur, duke e përdorur këtu shifrën e përfolur të të gjithë shqiptarëve që jetojnë në Zvicër, transmeton albinfo.ch. Këtyre kosovarëve, Fanger dëshiron “t`ua sjellë një copë vendlindje” në Zvicër.

“Në Kosovë ekziston “Spirit of Drini” tashmë dy vjet dhe prodhuesi i tij ka punësuar 60 persona gjatë 26 muajve të fundit. “Madje edhe qeveria pi ujin tonë”, thotë me mburrje Fanger.

Tash për tash ka vetëm ujë mineral pa gaz por muajin tjetër do të vijë edhe ai i gazuar.

E veçanta e këtij uji që sillet në Zvicër është komponenti humanitar, përcjell albinfo.ch. Nga çdo shishe e ujit cilësor që shitet këtu, ndahen 5 rapi (centë) për shtëpitë e fëmijëve SOS Kinderdorf në Kosovë.

Për t`iu afruar më mirë klientelës shqiptare në Zvicër, Fanger është bërë sponsor i klubit FC Kosova të Cyrihut, që është skuadra deri tash më e suksesshme e futbollit ndër shqiptarët  e Zvicrës.

Importuesi thotë se ky ujë nuk u dedikohet vetëm shqiptarëve, domethënë, ai si menaxhues, përveç lidhjes emocionale që kanë shqiptarët me ujin nga vendlindja e tyre, llogarit edhe në cilësinë e lartë të këtij uji. “Spirit of Kosova” tashmë është pranuar në labelin e ujërave kualitative “Fine Waters” , thotë ai.

http://de.spirit-of-drini.com/