50% të psikiatërve janë të huaj: pacientët zviceranë ndihen të pakuptuar

Mundësia që sot në Zvicër të takohesh me një specialist të ardhur nga jashtë është  rreth 50 për qind. Ndërsa përqindja e psikiatërve të huaj do të vazhdojë të rritet në vitet e ardhshme

Pikërisht aty ku gjuha dhe kuptimi i kulturës e zakoneve janë më të rëndësishmet, punojnë gjithnjë më pak vendës (zviceranë). Bëhet fjalë për punën në psikiatri, që sipas emisionit “Puls” të SRF-së, po bëhet gjithnjë më shumë punë për mjekë të huaj.

Renata Bleichenbacher, atë që i ka ndodhur, e përshkruan si “refuzim për ofrim ndihme”: ajo ndodhej në një krizë të rëndë psikologjike, kishte mendime vetëvrasëse dhe, pikërisht në këtë situatë, ishte duke u përballur me një psikiatër të huaj, i cili nuk e kuptonte.

Sipas Thomas Ihde, i cili është vetë psikiatër dhe kryetar i organizatës së pacientëve “Pro Mente Sana”, ky nuk është një rast i izoluar, transmeton albinfo.ch. “Ne vazhdojmë të dëgjojmë nga të prekurit në telefonin e këshillimit se ata e kanë bindjen se terapistët nuk e kanë kuptuar gjuhën e tyre”.

Dhe kjo do të thotë gjithashtu se ata ngurrojnë të hapen në bisedë. Në të vërtetë: Mundësia që sot në Zvicër të takohesh me një specialist të ardhur nga jashtë është  rreth 50 për qind. Ndërsa përqindja e psikiatërve të huaj do të vazhdojë të rritet në vitet e ardhshme, përcjell albinfo.ch. Kjo tregohet nga një vlerësim që “Pulse” ka bërë me të dhëna aktuale nga regjistri federal i profesionit mjekësor, MedReg.

Të gjitha gradat mjekësore të njohura në Zvicër, janë të regjistruara në MedReg, përfshirë këtu edhe titullin specialist “Psikiatri dhe Psikoterapi”. Analiza e regjistrimeve të reja vjetore  tregon se në 10 vitet e fundit, përqindja e personave që kanë studiuar mjekësi (gradë doktor) në Zvicër është ulur nga 42 në 19 për qind në 2019. E kjo do të thotë se rreth 80 për qind e specialistëve të licencuar rishtazi në psikiatri nuk i kanë përfunduar studimet e tyre bazë në Zvicër.

Ky zhvillim është shqetësues për Thomas Ihde. Gjuha dhe kuptimi kulturor janë elemente thelbësore për fushën e tij, përcjell albinfo.ch. Sidomos kur bëhet fjalë për “leximin midis rreshtave”, mimikënn dhe komunikimin me pacientët në dialekt.

Por, Erich Seifritz nga Shoqata e Mjekëve Kryesorë të Psikiatrisë SVPC e sheh këtë si më pak problematike. Mjekët nga jashtë do të duhet të demonstrojnë aftësitë e nevojshme gjuhësore në momentin kur fillojnë të punojnë në Zvicër. Ata duhet të integrohen shpejt dhe  ta kuptojnë shpejt dialektin.

Fluksi i madh i specialistëve të huaj në këtë fushë është mahnitës, transmeton albinfo.ch. Zvicra tashmë ka një dendësi  shumë të lartë të psikiatërve në krahasim ndërkombëtar.

Thomas Ihde e përshkruan sistemin e këtushëm të rekrutimit si “shumë të përqendruar te mjeku”. Si mjek kryesor i shërbimeve psikiatrike në Spitalin Interlaken, ai gjithnjë e më shumë mbështetet në përfshirjen e psikologëve dhe specialistëve me përvojë. Në këtë mënyrë ai thotë se  punëson më pak psikiatra, të cilët do të duhej t`i rekrutonte nga jashtë, përcjell albinfo.ch. Ai pra bazohet në modele të rekrutimit që funksionojnë në Holandë ose në vendet skandinave.

Si rezultat i mungesës së specialistëve, shumica e klinikave janë në proces të zhvillimit të modeleve të reja të bashkëpunimit, sipas Erich Seifritz. Ato kanë filluar t`u caktojnë më shumë detyra psikologëve dhe grupeve tjera profesionale. Sidoqoftë, aspektet ligjore dhe tarifore ende duhet të sqarohen, transmeton albinfo.ch. Trajnimet e mëtejshme janë gjithashtu të nevojshme.

---