50 ministra të jashtëm në Konferencën Ministrore të OSBE-së

Në fokus të ditës së parë të konferencës së sivjetme është situata në Ukrainë ndërsa të ditës së dytë luftimi i terrorizmit ndërkombëtar

Me ftesën e Zvicrës ne cilësinë e kryesueses së OSBE-së, më 4 dhe 5 dhjetor në Bazel mbahet konferenca vjetore e këshillit ministror të OSBE-së.

Në fokus të ditës së parë të konferencës së sivjetme që mbahet në nivel ministrash të jashtëm është situata në Ukrainë ndërsa të ditës së dytë luftimi i terrorizmit ndërkombëtar.

Para hapjes së konferencës, më 3 dhjetor mblidhet Forumi organizatave të Shoqërisë Civile. Ata do t`i dorëzojnë kryesuesit, Didier Burkhalter një deklaratë përkatëse për të drejtat e njeriut, tolerancën, dhe mosdiskriminimin.

Situata në Ukrainë do të jetë në fokus edhe të takimit paraprijës më 3 dhjetor me ministrat e jashtëm të pranishëm.

Në Bazel priten mbi 70 delegacione të shteteve anëtare të OSBE-së dhe organizata të tjera ndërkombëtare. Këshilli ministror i OSBE-së i përcakton detyrat e kësaj organizate. 50 nga delegacionet do të udhëhiqen nga ministrat e jashtëm të vendeve përkatëse, thuhet në një komunikatë të Departamentit të Jashtëm të Qeverisë së Zvicrës.  

Ministri i jashtëm njëherësh president i federatës, Didier Burkhalter ka qenë, në emër të Zvicrës, gjatë një viti kryeues i OSBE-së. 

Nga 1 janari 2015 Zvicrën në kreun e OSBE-së do ta zëvendësojë Serbia.