5 vjet punë në Shqipëri kush studion për mjekësi

Maturantët që do të zgjedhin degën e Mjekësisë për të studiuar do të kenë si kusht të panegociueshëm një marrëveshje për të punuar 5 vjet në atdhe pas përfundimit të studimeve për t’u pajisur me diplomë.

Qeveria ka miratuar projekligjin, i cili përcakton kushtet e kontratës, e që do të kalojë me procedurë të përshpejtuar në Parlament për të hyrë në fuqi prej këtij viti akademik.

“Ata që shpallen fitues përpara regjistrimit në Universitet, do të nënshkruajnë një marrëveshje me Universitetin e Mjekësisë, me Ministrinë e Arsimit dhe me Ministrinë e Shëndetësisë për t’u angazhuar që do të qëndrojnë 5 vite për punësim pas diplomimit të tyre në Shqipëri”, tha ministrja e Arsimit, Evis Kushi.

Studentët që janë aktualisht në degën e Mjekësisë që nuk do duan të nënshkruajnë kontratën, do të jenë të detyruar të paguajnë tarifat e plota të shkollimit që do të përcaktohen nga Fakulteti i Mjekësisë.

“Do t’i ofrohet edhe mundësia që nëse nuk janë dakord të nënshkruajnë marrëveshje të paguajnë sa është kostoja reale e çdo viti akademik”, shtoi ministrja Kushi.

Detyrimi për të punuar në atdhe për studentët aktualë të vitit të pestë dhe gjashtë do të jetë vetëm 2 vjet, për vitin e 3 dhe të 4, 3 vjet dhe për ata të vitit të parë, 5 vjet të plota.