4.218 shtetas të Kosovës të regjistruar për votim në Bernë, Cyrih dhe Gjenevë

Foto: Albinfo

Procesi i votimit fizik për qytetarët e Republikës së Kosovës në Zvicër ka nisur sot në orën 07:00, në tri përfaqësi diplomatike: Bernë, Cyrih dhe Gjenevë.

Sipas të dhënave të Ambasadës së Kosovës në Zvicër, për këtë formë votimi janë regjistruar gjithsej 4.218 votues, prej të cilëve 2.114 në Cyrih, 1.053 në Bernë dhe 1.051 në Gjenevë.

Qendrat e votimit janë hapur sipas planifikimit dhe procesi po zhvillohet  në përputhje me udhëzimet e Komisionit Qendror të Zgjedhjeve të Kosovës.

Pas përfundimit të votimit, kutitë do të bllombohen dhe do të ruhen në hapësira të sigurta në përfaqësitë diplomatike, ndërsa transportimi i tyre drejt Kosovës është planifikuar për ditën e hënë, më 29 dhjetor 2025.

Ky proces shënon një hap të rëndësishëm në përfshirjen e mërgatës kosovare në Zvicër në zgjedhjet parlamentare, duke dëshmuar edhe një herë interesimin e lartë të diasporës për proceset demokratike në vend.