30-vjeçari nga Kosova u qëllua nga bashkëkombësi i tij

Detaje tjera janë bërë të ditur për vdekjen e një shqiptari nga Kosova në Hannover të Gjermanisë

Një shqiptar nga Kosova është vrarë të enjten në mesditë në Hannover të Gjermanisë. Tashmë janë dhënë detaje tjera nga ky rast i rëndë, përcjell albinfo.ch.

Njëri prej tyre, i identifikuar si Armin N., 30-vjeç, u qëllua me armë zjarri në një nga kryqëzimet e qytetit gjerman, teksa ndodhej brenda automjetit të tij tip “Porsche Cayenne”, ku si pasojë mbeti i vrarë në vend.

Dyshohet se autor i ngjarjes është një tjetër shqiptar nga Kosova, i identifikuar si Rinor Z., i cili drejtonte automjetin tip “Mercedes Benz”.

Hetimet janë duke vazhduar edhe pse dyshohet se ka më shumë persona të përfshirë në këtë ngjarje.

Sipas dëshmitarëve, drejtuesi i “Mercedes Benz-it”, Rinor Z., pas përplasjes është larguar në këmbë, ndërsa ka arritur t’i shpëtojë forcave të policisë. “Autori i dyshuar i vaisjes është larguar, jemi ende në kërkim të tij”, është shprehur Katrin Söfker, zëdhënëse e zyrës së prokurorit publik në Hanover të Premten.

Mediat gjermane bëjnë me dije se hetuesit dyshojnë se Rinori ndodhet ende në Gjermani, në Hanover apo edhe Langenhagen.

Armin N. nuk ishte një emër i panjohur për drejtësinë gjermane. Emri i tij është lakuar më 22 mars të 2017-ës, për një përplasje me armë zjarri në Andreas-Hermes-Platz, ku mbeti i vdekur një person. Për këtë vrasje, si autor u dyshua pikërisht ai, i cili mbeti i vdekur ditën e sotme. Para kësaj, ishte plagosur nga disa goditje me thikë.

 

---