3 vjet burgim shoferit që shkeli për vdekje dy këmbësore

Gjykata Themelore në Prishtinë, Departamenti i Përgjithshëm, Divizioni për Çështje Penale, ka shpallur Aktgjykimin kundër të akuzuarit L.M.

I akuzuari, L.M. është shpallur fajtor dhe është dënuar me dënim me burgim në kohëzgjatje prej 3 (tre) vjetësh e 6 (gjashtë) muaj për veprën penale “Rrezikim i trafikut publik”, njofton Klan Kosova, përcjell albinfo.ch.

Të akuzuarit në dënimin e shqiptuar do t’i llogaritet koha e kaluar në paraburgim nga data 22.10.2018 e deri më tani, ndërsa i ndërpritet masa e paraburgimit dhe i njëjti lirohet që të mbrohet në liri nga data 04.03.2019.

I akuzuari L.M. është akuzuar nga Prokuroria pasi që më 22.10.2018, rreth orës 16:10, në rrugën B – afër “Royall Mall” në Prishtinë, duke drejtuar veturën e tij të tipit BMW kishte shkelur Ligjin mbi trafikun publik dhe kishte vënë në rrezik jetën e njerëzve nga pakujdesia, në atë mënyrë duke mos e përshtatur shpejtësinë e lëvizjes dhe duke mos u dhënë përparësi kalimi këmbësorëve në vend kalimin për këmbësor, i kishte goditur këmbësoret L.A. dhe F.R. e si pasojë e lëndimeve të marra, të ndjerat kanë vdekur në QKUK.