2000 veta demonstrojnë në Lozanë kundër detyrimit për certifikatë

Turma ka brohoritur sloganet  "Liberté, liberté, liberté!" (Liri) dhe i ka bërë thirrje ministrit të Shëndetësisë, Alain Berset, të japë dorëheqjen

Rreth 2,000 njerëz kanë demonstruar mbrëmjen e sontme në Lozanë, kundër detyrimit për certifikatën Covid, raporton srf.ch.

Demonstrata u organizua nga shoqata e studentëve “Education sans certificat (ESC)” (Edukimi pa certifikatë).

Ky grupim i ri i studentëve kundërshton certifikimin e detyrueshëm në universitete dhe kërkon “qasje të barabartë në arsim për të gjithë”.

Turma ka brohoritur sloganet  “Liberté, liberté, liberté!” (Liri) dhe i ka bërë thirrje ministrit të Shëndetësisë, Alain Berset, të japë dorëheqjen, transmeton albinfo.ch.  Në pankarta u denoncua certifikata në fjalë, duke u quajtur “Pasaporta e turpit”.

Demonstrata, për të cilën organizatorët nuk kishin kërkuar leje, ka kaluar pa probleme dhe është monitoruar nga disa policë.

Demonstrata u organizua për të shënuar fillimin e vitit të ri akademik në Vaud të martën. Fillimi i semestrit të vjeshtës ka shkuar kryesisht pa probleme dhe në një atmosferë të mirë në kampusin e Universitetit të Lozanës dhe Institutit Federal të Teknologjisë Zvicerane në Lozanë (EPFL).

---