200 persona janë testuar dhe liruar nga karantina në Qendrën e Studentëve

Ministri i Infrastrukturës dhe Ambientit, në detyrë, Lumir Abdixhiku, ka bërë të ditur se mbi 500 persona janë të vendosur në konvikte, prej të cilëve janë testuar 200, që më pastaj janë liruar për në shtëpi.

Ministri i Infrastrukturës dhe Ambientit, në detyrë, Lumir Abdixhiku, ka njoftuar se karantinimi në Qendrën e Studentëve është duke funksionuar mirë.

Ai ka bërë të ditur se mbi 500 persona janë të vendosur në konvikte, prej të cilëve janë testuar 200, që më pastaj janë liruar për në shtëpi.

“Kushtet në karantinë mund të mos ishin nga më të mirat, ditët e para mund të kishin qenë edhe të vështira – mësuam në vështirësi – por karantinimi po funksionon. Mbi 500 qytetarë tanë janë vendosur aty. Janë ushqyer, përkujdesur e trajtuar me kapacitetet e një shteti që aq sa ka jep – por jep gjithçka. Janë testuar dyqind prej tyre, të gjithë janë liruar për në shtëpi. Qindra të tjerë do të kthehen gradualisht e do të vendosen aty njëtrajtësisht”, ka thënë Abdixhiku.

Ai ka thënë se karantina ka ndihmuar shumë në mospërhapjen e koronavirusit.

“Të testuarit pozitiv, 3 sosh, për shkak të karantinimit nuk kanë kontaktuar askënd. As brenda as jashtë. Sa për krahasim, vetëm një qytetar pozitiv në një qytezë Kosove ka nisur zinxhirin pozitiv tek mbi 50 të tjerë. Pa karantinë do të kishim shpërthim. Me karantinë kemi edhe kontroll edhe kthim në shtëpi”, thekson ai.

Ai ka falënderuar qytetarët që kanë qëndruar aty, shërbyesit, policët e të gjithë vullnetarët për punën e tyre.

“Për këtë duhet falënderuar të gjithë. Qytetarët që me durim qëndrojnë aty; por mbi të gjitha shërbyesit e qendrës, të shëndetësisë, policët, ushtarët e vullnetarët që kanë bërë të vlejë i gjithë ky angazhim”, ka shkruar Abdixhiku në Facebook.

---