180 mijë franga zvicerane për zhvillimin e turizmit në Maqedoni

Agjencia për Zhvillim dhe Bashkëpunim e Zvicrës së bashku me organizatën përkatëse në vend dhe kompaninë “Pharmachem” përmes programit për mbrojtjen e natyrës në Maqedoni ka dhënë 180 mijë franga zvicerane për zhvillimin e turizmit në Maqedoninë Lindore.

Kryetarët e njëmbëdhjetë komunave të rajonit kanë identifikuar propozim-projektet të komunave që do të financohen në kuadër të programit në fjalë.

Nga dhjetë projektet e propozuara janë pranuar vetëm pesë, të cilat duhet të përfundojnë deri në fund të vitit 2016.

Projektet e miratuara kanë të bëjnë me lokalitetin arkeologjik në komunën e Zërnovcit, që arrin shumën 30 mijë euro, pastaj për një  qendër turistike informative, për të cilin Komuna e Koçanit do të marre 60 mijë euro për rindërtimin e një ndërtese të vjetër në Qendrën Informative.

Programi ka paraparë projektin edhe në Kamenicë të Maqedonisë në vlerë prej 50 mijë franga për projektin “parkohuni dhe bëni fotografi”, që do të përfshijë dy parkingje, kanalizime dhe tabela përgjatë liqenit Kalimanci.

Me të njëjtin program komuna Probishtip do të marrë 20 mijë euro dhe 20 mijë tjera do të ndahen për komunën e Shtipit.