10 të lënduar nga shfaqja me fishekzjarrë në Fribourg

80Centimes, Twitter

Komuna e Fribourgut në Villars-sur-Glane të hënën në mbrëmje ka organizuar një shfaqje me fishekzjarrë.

Megjithatë, nuk shkoi gjithçka sipas planit, pasi disa fishekzjarre fluturuan në turmën e njerëzve që ishin mbledhur për të parë shfaqjen.

Siç shkruan 20minuten, disa persona janë lënduar.

Raportohet gjithashtu se njerëzit kanë pësuar djegie, edhe pse janë marrë masa të shumta sigurie. Një dëshmitar okular raporton se audienca duhej të evakuohej përpara se të fillonin fishekzjarrët.

Rreth dhjetë persona u plagosën në këtë incident, tha policia. Një grua 29-vjeçare është dërguar në spital.

Nuk është ende e qartë se si mund të ketë ndodhur kjo. Aktualisht po hetohen shkaqet e aksidentit, përcjell albinfo.ch.

Policia kantonale në Fribourg ka konfirmuar incidentin dhe në një deklaratë ka shkruar se disa persona janë lënduar nga objektet piroteknike.

Ata kanë marrë thirrjen e urgjencës rreth orës 23:00. Për arsye sigurie, fishekzjarrët u anuluan menjëherë dhe e gjithë ngjarja u shkurtua. Në festival morën pjesë rreth 3000 persona, siç shkruan “La Liberté”.