1 Maji – Dita Ndërkombëtare e Punëtorëve, në Kosovë pushim

Ilustrim: Prishtina

1 Maji shënon Ditën ndërkombëtare të punëtorëve, kur nisi nga lufta e punëtorëve të të kërkuar më shumë siguri, liri dhe kushte më të mira të punës.

Në Kosovë, kjo ditë është festë zyrtare dhe të gjitha institucionet publike nuk punojnë.

Madje, duke pasur parasysh që në Prishtinë, shumë qytetarë në këtë ditë shfrytëzojnë Parkun e Gërmisë, komuna ka marrë vendim që të ndalojë qarkullimin për vetura.

“Pika përfundimtare për lëvizjen e automjeteve, përveç banorëve të lagjeve: ‘Normale’, ‘Sofalia’, ‘Tauk- Bahçe’ dhe restoranteve— villat Gërmia ‘Freskia’, dhe ‘Soma’ do të jetë: Kryqëzimi rrugëve ‘1 Tetori’— ‘Nazim Gafurri’ dhe ‘Ymer Lutfi Paqarizi’. Kryqëzimi rrugëve ‘Nazim Gafurri’- ‘Xhavit Ahmeti’ dhe ‘Dr. Lec Gradica’. Kryqëzimi i rrugëve ‘Shpëtim Robaj’ me atë të Sofalis, në drejtim të pishinës dhe parkut ‘Gërmia’. Drejtoria e Inspekcionit – Komuna e Prishtinës do të kujdeset për implementimi e kësaj urdhërese”, thuhet në njoftimin e komunës, përcjell albinfo.ch.

Për të shënuar këtë ditë, në Kosovë po ashtu protestohet nga Federata Sindikale e Punëtorëve Teknik të Sektorit Privat të Kosovës për të kërkuar rritjen e pagave.

Sektori privat në Kosovë ballafaqohet me mungesa të shumta si ato të pagës, sigurisë e të drejtave në punë.

Kjo ka bërë që edhe një numër i madh i qytetarëve të nxitur nga mungesa e kushteve të kërkojnë punë në vendet e Bashkimit Evropian.

Tashmë Kosova ballafaqohet me mungesa të punëtorëve në shumë sektorë, përfshirë edhe atë të shëndetësisë e ndërtimit, përcjell albinfo.ch.