​Eskalon situata: 7 aktivistë të Vetëvendosjes arrestohen

Përplasja ndërmjet aktivistëve të LVV dhe Policisë, erdhi në kohën kur disa persona tentuan t’i vendosin disa fletushka në veturat zyrtare, gjë që u penguan nga policia

Shtatë aktivistë të Lëvizjes Vetëvendosje janë arrestuar sot nga Policia e Kosovës, gjatë një përleshje para objektit të Qeverisë. Përplasja ndërmjet aktivistëve të kësaj partie opozitare dhe Policisë, erdhi në kohën kur disa persona tentuan të shpërndajnë disa fletushka nëpër veturat zyrtare, gjë që u penguan nga forcat e rendit.

Sipas një njoftimi lëshuar nga Policia, thuhet se në ora 14:00, policia ka marrë informacionin se një grup personash duke mos përfillur urdhrat e policisë po tentojnë të futen në objektin e Ministrisë së Drejtësisë.

“Menjëherë pas informacionit, policia ka dalë në vendin e ngjarjes dhe duke parë shpërfilljen e vazhdueshme të urdhrave të zyrtarëve policor nga ana e grupit, ka ndërmarrë të gjitha veprimet e nevojshme në bazë të autorizimeve policore, gjë që ka rezultuar me shoqërimin e shtatë personave në stacionin policor Qendra në Prishtinë”, thuhet në komunikatë.

Përderisa policia ka vepruar me qëllim të neutralizimit dhe vënies nën kontroll të situatës së krijuar, tre zyrtarë policor, siç thuhet, kanë marrë lëndime dhe të njëjtëve u është ofruar ndihma mjekësore.

Në anën tjetër, Lëvizja Vetëvendosje thotë se aktivistët e kësaj partie kanë tentuar të vendosin një udhëzim administrativ nëpër veturat që ndodheshin në oborrin e ndërtesës së re të Qeverisë së Kosovës, por nuk janë lejuar nga Policia e Kosovës.

Në fletushkat e Vetëvendosje thuhet që zyrtarët qeveritar t’i shesin pronat e veta jo të shtetit.