Zvicra po shqyrton mbylljen e disa qendrave të azilit

Në kohën e kulmit të krizës së refugjatëve, në vitin 2015 kishte afër 40.000 kërkesa të regjistruara azili, ndërsa në vitin 2018 ishin vetëm 15.000 sosh

Nga shkaku i numrit në rënie të kërkesave për azil në Zvicër, Qeveria Federale është duke shqyrtuar nëse kapacitetet në dispozicion duhet të përshtaten me këtë trend, gjegjësisht të zvogëlohen ose jo.

Sekretariati Shtetëror për Migracion (SEM) e ka konfirmuar një lajm me këtë përmbajtje që e kishte publikuar gazeta Aaraguer Zeitung. Do të shqyrtohet po ashtu nëse azilkërkuesit e refuzuar mund të dëbohen në mënyrë më efikase dhe nëse fare ka nevojë të vazhdohet kërkimi i lokacioneve të tjera për qendra të reja federale të azilit, transmeton albinfo.ch.

Aktualisht qendrat federale të azilit disponojnë me më shumë se 4000 shtretër, ndërsa në fund të qershorit, ishin të shfrytëzuar më pak se gjysma e tyre. Ndërkaq planet e federatës parashohin rritjen e këtij kapaciteti deri në 5000 shtretër.

Lidhur me ecurinë e mëtejshme në këtë drejtim, ministrja që e mbulon këtë sektor, Karin Keller-Sutter do të vendosë në muajin shtator, përcjell albinfo.ch. Deri atëherë do të shqyrtohen edhe masat për shpejtimin e përpunimit të lëndëve të azilit, thonë në SEM.

Në Zvicër, në kohën e kulmit të krizës së refugjatëve, në vitin 2015 kishte afër 40.000 kërkesa të regjistruara azili, ndërsa në vitin 2018 ishin vetëm 15.000 sosh

---