Zvicerani Infantino bëhet president i FIFA-s

Në krye të Federatës Botërore të Futbolli vjen Gianni Infantino nga Zvicra, i cili është zgjedhur president i ri i FIFA-s.

Keystone

Infantino ka fituar 115 nga 207 votat e vlefshme, duke mundur rivalin më të afërt, sheikun Salman nga Bahrejni.

“Është koha të rikthejmë futbollin. FIFA ka kaluar nëpër kohë të vështira, kohë krize. Duhet të kthejmë respektin dhe të fokusohemi në lojën e bukur të futbollit”, ka thënë Infantino në fjalimin e parë si president.

Infantino, i cili e pason Sepp Blatterin, do të jetë president deri më 2019.

Infantino ishte sekretar i përgjithshëm i Federatës Evropiane të Futbollit – UEFA.

Infantino filloi punë pranë UEFA-s në gusht 2000, ku ka përmbushur detyra të ndryshme, duke u ngjitur gradualisht në karrierë deri kur mori postin e sekretarit të përgjithshëm më 2009.

Para se të punonte për UEFA-n, ai ka qenë sekretar i përgjithshëm i Qendrës Ndërkombëtare të Studimeve Sportive në Universitetin e Neuchatelit.
Sepp Blatter humbi postin pas skandalit për korrupsion në organizatë.