Zviceranët s`duan t`ia dinë për dioksinën

Importuesit e produkteve ushqimore nga Gjermania thonë se kërkesa për artikujt nga Gjermania ka mbetur e pandryshuar

Skandali i dioksinës, i cili në Gjermani po shkakton brengosje serioze në mesin e konsumatorëve, në Zvicër, duket se nuk është duke u marrë me shumë shqetësim.

Importuesit më të mëdhenj zviceranë të produkteve ushqimore nga Gjermania si Coop, Migros, Aldi Suisse dhe Lidl Schweiz, i kanë deklaruar medieve zvicerane se kërkesa e konsumatorëve të tyre për artikujt ushqimorë nga Gjermania ka mbetur e pandryshuar.

Megjithatë, zëdhënës të Migros-it kanë deklaruar se është shënuar një rënie e lehtë e blerjes së vezëve dhe mishit të pulës nga Gjermania, në dobi të artikujve të ngjashëm nga Zvicra.

Po ashtu, as në Coop dhe as në Migros nuk është shënuar ndonjë rritje e numrit të blerësve nga Gjermania, në zonat kufitare, çfarë mund të pritej pas shpërthimit të skandalit të dioksinës.