Zbulohen çmimet e biletave Turqi-Kosovë

Bileta më e lirë është 15 lira turke, ose 4.42 euro, për tribunën prapa portave. Në tribunën lindore, bileta kushton 30 lira turke ose 8.84 euro, kurse ajo për tribunën qendrore, që llogaritet më e shtrenjta, është 50 lira, ose 14.73 euro

Pas dy humbjeve nga Kroacia dhe Ukraina, Kosova po mendon për sfidën e ardhshme që do të jetë në Antalia të Turqisë, shkruan albinfo.ch.

Federata e Futbollit e Turqisë, ka zbuluar ndërkohë çmimin e biletave për ndeshjen Turqi-Kosovë, që zhvillohet më 12 nëntor në Antalia, në kuadër të grupit I kualifikues të botërorit “Rusi 2018”.

Bileta më e lirë është 15 lira turke, ose 4.42 euro, për tribunën prapa portave. Në tribunën lindore, bileta kushton 30 lira turke ose 8.84 euro, kurse ajo për tribunën qendrore, që llogaritet më e shtrenjta, është 50 lira, ose 14.73 euro.

Çmimi i këtyre biletave, mund të ndikojë edhe në tifozët kosovarë, të cilët mund të udhëtojnë drejt Turqisë për të përkrahur Kosovën. Sipas Federatës turke, biletat dalin në shitje prej 20 tetorit dhe ato mund të blihen online në sitin zyrtar.

Pritet që në këtë ndeshje të ketë edhe një numër të madh të shqiptarëve që janë shpërngulur me vite në Turqi, e gjithashtu edhe nga shqiptarët e diasporës.

Ndërkohë, shumë kompani turistike në Kosovë kanë filluar me ofertat për të shikuar ndeshjen në Turqi, ku për dy net e tri ditë qëndrimi në Turqi, duke përfshirë edhe çmimin e biletës, oferta në tërësi kushton 300 euro.