Yll Maliqi: Falënderoj Diasporën Shqiptare, titullin ia dedikoj Kosovës

Kikboksieri shqiptar Yll Maliqi u shpall kampion i botës në versionin WKU në 86 kilogramë. Kjo fitore ishte e veçantë pasi ai mundi kampionin botëror, serbin Denis Marijanoviq dhe ia rrëmbeu titullin.

Maliqi nga Prishtina ka falënderuar të gjithë për përkrahjen që i kanë dhënë. “Të dashur miq, ju falënderoj përzemërsisht për përkrahjen tuaj dhe ardhjen nga mbarë Evropa në Zvicër për të qenë pjesë e fitores sime për titullin botëror në World Kickboxing Union ku përballë kisha një nga kundërshtarët më të fuqishëm në karrierën time.

Rruga drejt këtij titulli u hap me fitoren e atij të kampionit evropian në profesionizëm ku fitova të drejtën për të luftuar për kualifikim për titullin botëror të cilën luftë e fitova para një viti me nokaut kundër kundërshtarit Hasanagiq. Fitore kjo që më kualifikoi për të sfiduar kampionin botëror serbin tashmë ish-kampion botëror në WKU, Denis Marjanoviq i cili ka 51 lufta, 40 fitore.

Faleminderit për punën e palodhshme të trajnerit Gasper Kaçinari. Gjithashtu për mbështetjen e trajnerit Bashkim Berisha dhe Mehdi Pestisha.

Ndërsa falënderim të veçantë dhe respekt të madh për Diasporën Shqiptare, organizatorin Skënder Shahinaj i cili organizoi këtë kampionat të madh nga i cili me krenari po ja sjell titullin botëror vendit tonë Kosovës dhe mbarë shqiptarëve”, ka shkruar Maliqi në “Facebook”, përcjell albinfo. Për Maliqin kjo ishte fitorja e 14-t në karrierë, karshi 3 humbjeve dhe një barazimi në kikboksin profesionist. Ndërsa Marijanoviq pësoi humbjen e 11-të, karshi 39 fitoreve.