Wenger, i impresionuar nga Xhaka

Trajneri i Arsenalit, Arsene Wenger është befasuar nga golat e Xhakës, por edhe nga paraqitjet e mesfushorit shqiptar

Mesfushori shqiptar, Granit Xhaka është në top-formë. Ai shënoi dy gola në dy ndeshjet e fundit. Të dy golat ishin nga distanca. Paraqitjet e tij i ka lavdëruar edhe trajner francez, Arsene Wenger, shkruan albinfo.ch.

“Të jem i sinqertë, nuk e prisja këtë, me të vërtetë jo. E dija se e ka një goditje të mirë dhe të fuqishme. Mirëpo, ai ka luajtur shumë më në thellësi sezonin e kaluar dhe nuk ka shkuar në sulm shpesh”, ka thënë trajneri francez pas ndeshjes.

“Mirëpo, shpresoj që kjo do t’i japë atij vetëbesim dhe shtytje për të shkuar përpara. Është diçka e madhe për të që ta mbajë besimin sa më mirë dhe që ta dijë se mund të shënojë edhe gola”, ka vazhduar Wenger.

“Unë personalisht e preferoj atë në dyluftimet një në një. Ai ka motor, ka fuqi, e ka pasimin e gjatë. Ai pëlqen të arrijë nga thellësia dhe ta menaxhojë lojën, mirëpo mendoj se ai e ka motorin që të ketë impakt me lëvizjet e tij”, ka përfunduar trajneri i Arsenalit.

Paraqitjet e Xhakës i kanë vlerësuar lart edhe mediumet e analistët në Angli, kurse Xhaka është bërë edhe idhull i tifozëve të kësaj skuadre.