VV dhe LDK pezullojnë bisedimet për presidentin

Lëvizja Vetëvendosje dhe Lidhja Demokratike e Kosovës nuk planifikojnë të vazhdojnë gjatë ditëve në vijim bisedimet për çështjen e presidentit të ri të Kosovës.

Lëvizja Vetëvendosje (LVV) dhe Lidhja Demokratike e Kosovës (LDK) kanë pezulluar për momentin bisedimet për presidentin e ri të Kosovës, pas tërheqjes së Bekim Sejdiut nga kandidatura për këtë post.

LDK-ja nuk e konsideron të arsyeshme të zhvillojë takime për këtë çështje me përfaqësuesit e LVV-së para se Gjykata Kushtetuese të marrë vendim nëse konstituimi i legjislaturës së 11-të të Kuvendit të Kosovës është bërë në përputhje me Kushtetutën, transmeton albinfo.ch.

“Nuk ka takime, pa vendim të Gjykatës Kushtetuese”, ka deklaruar shkurt nënkryetari i LDK-së, Lutfi Haziri.

Pezullimi i bisedimeve është konfirmuar edhe nga burime brenda LVV-së, sipas të cilave gjatë kësaj jave nuk është planifikuar ndonjë takim me përfaqësuesit e LDK-së për çështjen e presidentit.

Ky zhvillim vjen pasi Partia Demokratike e Kosovës më 14 shtator e dërgoi në Gjykatën Kushtetuese për shqyrtim procesin e konstituimit të Kuvendit, duke kërkuar gjithashtu vendosjen e një mase të përkohshme. PDK-ja ka kundërshtuar mënyrën e zgjedhjes së kryetarit dhe nënkryetarëve të Kuvendit, duke pretenduar se gjatë procesit janë shkelur afatet kushtetuese.

 

---