Vrasje në Prishtinë, Policia është në kërkim të personit të dyshuar

Një i dyshuar, mashkull për motive të panjohura, nga një veturë në lëvizje ka shtënë me armë zjarri në drejtim të katër personave të cilët ishin duke ecur rrugës

Policia e Kosovës në raportin 24 orësh ka dhënë sqarime për vrasjen e një person dhe plagosjen e një femre që në ka ndodhur në rrugën “Fehmi Agani”, në Prishtinë, transmeton albinfo.ch. Sipas Policisë së Kosovës, rasti ka ndodhur mbrëmë rreth orës  02:20, kur një i dyshuar, mashkull për motive të panjohura, nga një veturë në lëvizje ka shtënë me armë zjarri në drejtim të katër personave të cilët ishin duke ecur rrugës, dhe është larguar në drejtim të panjohur.

“Viktima mashkull ka pësuar lëndime vdekjeprurëse dhe ka vdekur në emergjencë. Ndërsa lëndime ka pësuar edhe viktima femër, e cila është dërguar në tretman mjekësor dhe sipas mjekëve është jashtë rrezikut për jetë”, thuhet në njoftimin e policisë.

Aty theksohet se me vendim të prokurorit, është kontrolluar shtëpia e të dyshuarit, por nuk është gjetur asgjë e dyshuar. E po ashtu thuhet se është  kontrolluar një objekt ku dyshohet që ishte fshehur i dyshuari, me këtë rast janë gjetur dhe konfiskuar dy armë, njëra armë dyshohet që ishte përdorur në rast dhe një veturë të cilën e ka shfrytëzuar i dyshuari.