Vlera e futbollistëve kuqezi

Pas Gjermanisë, në vendin e dytë si përfaqësuesja më e shtrenjtë është Spanja, me 557.5 milionë euro, më pas klasifikohen Belgjika, Franca, Anglia dhe Portugalia

(KEYSTONE/EPA/ARMANDO BABANI)

 Futbollistët e kombëtares shqiptare vlejnë 40.88 milionë euro në tregun e transferimeve. Portali “Transfermarkt” ka përpiluar një listë për vlerën e 552 futbollistëve të skuadrave pjesëmarrëse të Evropianit të Francës, ku Shqipëria ndodhet në vendin e 22-të në këtë klasifikim, shkruan albinfo.ch.

Gjermania është skuadra që ka në përbërje futbollistët me vlerën më të madhe në merkato, plot 562 milionë euro, ndërkohë që në total, vlera e të gjithë lojtarëve arrin në 4.9 miliardë euro, duke bërë që ky Europian të jetë kompeticioni i tretë më i shtrenjtë pas Ligës së Kampionëve dhe Ligës së Evropës, por në këto dy të fundit marrin pjesë edhe futbollistë të tjerë që nuk janë pjesë e këtij aktiviteti.

Pas Gjermanisë, në vendin e dytë si përfaqësuesja më e shtrenjtë është Spanja, me 557.5 milionë euro, më pas klasifikohen Belgjika, Franca, Anglia dhe Portugalia.

Përsa i përket futbollistëve, te kombëtarja shqiptare futbollisti më i shtrenjtë është Elseid Hysaj. Sipas “Transfermarkt”, mbrojtësi 22-vjeçar që aktivizohet me Napolin në Serie A ka një vlerë prej 9 milionë eurosh.

Ndërsa futbollisti më i shtrenjtë është padyshim Cristiano Ronaldo, me një vlerë prej 110 milionë eurosh, i ndjekur nga uellsiani Gareth Bale me 80 milionë, ndërsa në vendin e tretë është sulmuesi i Gjermanisë, Thomas Muller me 75 milionë euro. Më pas vijnë Robert Lewandowski dhe Eden Hazard, të dy me një vlerë prej 70 milionë eurosh secili.