Veprimtari nga Zvicra ndihmon gjyqtarët e Kosovës

Mehmet Jusufi së bashku me djalin e tij Mirsadin kanë sjellë ndihma, gjegjësisht komplete të veshjes për gjyqtarët e Kosovës në futboll

Federata e Futbollit e Kosovës (FFK) ka njoftuar se veprimtari i cili jeton dhe punon në Zvicër, Mehmet Jusufi ka ndihmuar gjyqtarët e Kosovës. Ai së bashku me djalin e tij Mirsadin kanë sjellë në FFK, komplete të veshjes për gjyqtarë, shkruan albinfo.ch.

Mehmet Jusufi me modesti u shpreh se është i lumtur nëse sadopak ka arritur të japë një kontribut për vendin dhe futbollin e Kosovës. “Ne do  të angazhohemi që kjo ndihmë modeste të shtohet sikur që do të orvatemi të ndihmojmë futbollin e Kosovës edhe në organizmin e ndeshjeve në veçanti me grup-moshat e reja U-10 deri U-13, që ekipeve të Kosovës t’u mundësohet pjesëmarrja në turnetë e ndryshme që organizohen në Zvicër”, ka thënë Jusufi.

Atë e ka falënderuar nënkryetari i FFK-së, Agim Ademi dhe kryetari i Komisionit për Gjyqtarë, Përparim Hasani.