Vazhdojnë përmbytjet në Itali, rrëzohet një helikopter

(KEYSTONE/AP Photo/Luca Bruno)

Në provincën italiane të Ravenës është rrëzuar një helikopter. Katër personat që ishin në bord u dërguan në spital, vetëm njëri prej tyre ishte lënduar, shkruan DW.

Provinca italiane e Ravenës është një prej më të goditurave nga përmbytjet.

Ekuipazhi kishte inspektuar linjat e energjisë elektrike të dëmtuara nga stuhitë në komunën e Lugos, kur helikopteri u rrëzua, përcjell albinfo.ch.

Situata u përkeqësua të premten, veçanërisht rreth qytetit të Ravenës, ku lumenjtë dolën përsëri nga shtretërit e tyre dhe rrëshqitjet e dheut aktualisht po rezultojnë të jenë një rrezik i madh.

Në disa pjesë të rajonit në bregdetin e Adriatikut niveli më i lartë i alarmit është ende në fuqi, njoftuan nga Departamenti i Mbrojtjes Civile i Italisë (Proetzione Civile) që merret me parashikimin, parandalimin dhe menaxhimin e ngjarjeve emergjente, shkruan DW.

Vërshimet dhe rrëshqitjet e dheut vazhdojnë të pllakosin zonat e prekura. Në disa vende uji po zvogëlohet ngadalë. Qindra punonjës shpëtimi dhe vullnetarë po punojnë tani për të pastruar rrugët nga balta.

Brigada italiane e zjarrfikësve është thirrur në më shumë se 3,000 operacione që përfshijnë rreth 1,000 zjarrfikës që nga fillimi i stuhive të forta, u raportua të shtunën në mëngjes, shkruan DW.

Ndërkohë, kryeministrja e Italisë, Giorgia Meloni, do të largohet nga samiti i Grupit të Shtatë (G7) në Hiroshima një ditë më herët se sa ishte planifikuar për të udhëhequr reagimin ndaj përmbytjeve që goditën veriun e vendit të saj këtë javë, thanë burime diplomatike për disa agjenci të lajmeve të shtunën.

Qeveria e Italisë planifikon të mbajë një mbledhje të kabinetit të martën për të vendosur mbi masat e ndihmës për zonat e prekura.