UEFA i përgjigjet Serbisë

Serbët ende nuk po mund të pranojnë se Kosova është pranuar në UEFA dhe kanë paralajmëruar padi në Gjykatën e Arbitrazhit Sportiv që ndodhet në Lozanë

Serbia kundërshtoi, por nuk arriti t’i bindte delegatët e UEFA-s që të mos e pranojnë Kosovën në këtë institucion. Tashmë, serbët kanë paralajmëruar padi ndaj UEFA-s për të shfuqizuar këtë vendim, por kjo nuk po e shqetëson UEFA-n, shkruan albinfo.ch.

“Mund edhe të ketë një padi ndaj nesh në Gjykatën e Arbitrazhit Sportiv (CAS), po e them këtë nga aspekti ligjor. Kjo nuk është diçka që ne kemi frikë, sepse ne këtu kemi marrë një vendim demokratik për një çështje sportive”, ka thënë drejtori për çështje ligjore në UEFA, Alasdair Bell.

“Pyetja e parë ishte nëse Kosova i plotëson kushtet për t’u bërë anëtare e UEFA-s dhe përgjigjja, sipas nesh, ishte PO. Pyetja e dytë ishte nëse shtetet anëtare e donin Kosovën pjesë të UEFA-s dhe ato sot votuan “PRO”. Nuk mund të them se çfarë do të ndodhë në të ardhmen me çështje ligjore, por kjo nuk më shqetëson në aspektin ligjor”, ka vazhduar anglezi.