Turqit e arrestuar i pret tortura dhe burgimi i përjetshëm

“Për këta persona nuk do të kemi asnjë lloj mëshirë ka thënë Erdogani. ‘Nuk do t’u japim asnjë pikë uji’, ka deklaruar ai. Këta persona që shkojnë atje do t’i nënshtrohet torturës”, ka thënë Muzhaqi

Bujar Muzhaqi, drejtori i Rrjetit të Shkollave Gyleniste, ka thënë në “Info Magazine” të Klan Kosovës se turqit që janë arrestuar në Kosovë dhe po besohet se janë dëbuar në Turqi, atje i pret tortura dhe burgimi i përjetshëm.

“Për këta persona nuk do të kemi asnjë lloj mëshirë ka thënë Erdogani. ‘Nuk do t’u japim asnjë pikë uji’, ka deklaruar ai. Këta persona që shkojnë atje do t’i nënshtrohet torturës”, ka thënë Muzhaqi, përcjell albinfo.ch.

Ai ka shtuar se ata “i pret burgim i përjetshëm”. “Ose do detyrohet të pranojnë gjëra në shërbim të Erdoganit, përndryshe do të dënohen me dënime maksimale”.

Ai ka folur edhe për institucionet e Kosovës, ka deklaruar se s’kanë besim fare në policinë e Kosovës e as institucionet tjera.

“Ato ishin veprime banditeske dhe rrugaçe. Arrestimi, rrëmbimi, është bërë në mënyrë shumë të shpejtë”.

Disa media në Turqi shkruajnë se tashmë ata janë dëbuar në Turqi, por Muzhaqi është i bindur se gjashtë të arrestuarit ende janë në Kosovë.

“Ata tashmë janë ekstraduar, sipas mediave turke që janë pro Erdoganit në Turqi. Por, ne jemi të sigurt se këta persona ende janë në Kosovë, prandaj bëjmë thirrje që të zbulohet ku janë këta persona”.

“Për mua është qesharake të mendosh se këta njerëz të cilësohen si terroristë. Këta persona vazhdimisht kanë qenë në Shqipëri ose Kosovë dhe s’u ka këmba në Turqi”.