Turqia hyn në bllokimin më të ashpër që prej fillimit të pandemisë

“Masat, përfshirë mbylljen e shkollave dhe qendrave tregtare, si edhe kufizimin e udhëtimeve ndërqytetëse, fillojnë sot në 19:00 dhe do të vazhdojnë pa ndërprerje deri në 05:00 më 17 maj”

Turqia ka vendosur një bllokim mbarëkombëtar trejavor sot në mbrëmje, bllokimi i saj më i ashpër që nga fillimi i pandemisë së COVID-19, për shkak të pamundësisë për të frenuaar rritjen e infeksioneve dhe vdekjeve, raporton Dpa, përcjell Albinfo.ch.

“Masat, përfshirë mbylljen e shkollave dhe qendrave tregtare, si edhe kufizimin e udhëtimeve ndërqytetëse, fillojnë sot më 19:00 dhe do të vazhdojnë pa ndërprerje deri në 05:00 më 17 maj”, njoftoi presidenti turk Recep Tayyip Erdogan.

Media lokale raportoi dyndje të banorëve në terminalet e autobusëve për të lënë Stambollin.

Të tjerët u përpoqën të dilnin nga metropoli me makinat e tyre, duke shkaktuar kilometra të tërë trafiku të zënë që nga orët e para të ditës, sipas të përditshmes “Hurriyet”.

Qendrat tregtare dhe supermarketet u tejmbushën, ndërsa njerëzit nxituan të grumbullonin ushqime, si edhe alkool, mes lajmeve për ndalimin e shitjes së pijeve alkoolike.

Mbyllja mbulon edhe festën e Bajramit pas muajit të agjërimit të Ramazanit.

Turqia rivendosi kufizimet në fund të marsit për shkak të një rritjeje të shpejtë të infeksioneve.

Infeksionet e reja ditore kaluan një nivel historik prej më shumë se 60 000 rastesh këtë muaj.

 

---