Trajneri gjerman i impresionuar nga Kosova

“Futbollistët e Kosovës kanë luajtur mirë, kanë vrapuar deri kur pësonin tërheqje muskulore. Kjo është mbresëlënëse”, ka thënë Kuntz

Kosova U-21 arriti barazim historik ndaj Gjermanisë U-21, që është kampione e Evropës, shkruan albinfo.ch.

Trajneri i Gjermanisë, Stefan Kuntz, ka lavdëruar ekipin e Kosovës. “Futbollistët e Kosovës kanë luajtur mirë, kanë vrapuar deri kur pësonin tërheqje muskulore. Kjo është mbresëlënëse”, ka thënë Kuntz, në një intervistë për Supersport pas përfundimit të takimit në stadiumin “Adem Jashari”.

Kuntz theksoi se ka pritur një lojë të tillë të Kosovës, por jo një rezultat të tillë. “Kam pritur se Kosova do të luaj mirë. Ky ekip ka të ardhme. Kemi pasur raste në pjesën e dytë dhe është dashur të fitojmë”, theksoi ai.

Barazimi ndërmjet Kosovës dhe Gjermanisë është komentuar në mediat gjermane.

“Kualifikimet për Evropian: Hap prapa! U-21 zhgënjen në Kosovë”, është titulli i “Bild”.

“Gjermania U-21 dështon para murit kosovar”, e ka titulluar “Kicker” lajmin rreth ndeshje së zhvilluar në Stadiumin Olimpik “Adem Jashari”.

“Turp për U-21: Vetëm 0-0 ndaj jofavoritit Kosovë”, është titulli i “Die Welt”.

“Ekipi i Gjermania U-21 rrëshqet”, e ka titulluar lajmin “Sport1.de”.