Gjermani: Një memorial kushtuar Sadri Berishës, të vrarë nga neonazistët

Në vitin 1992, punëtori shqiptar i Kosovës Sadri Berisha ishte viktimë e një vrasjeje me motive raciste. Njerëzit në Ostfildern duan t`i ngrejnë një memorial

Me organizimin e ngjarjeve përkujtimore, duke përfshirë disa të tilla para bashkisë, një iniciativë nga bashki Ostfildern vazhdon të përkujtojë vrasjen e Sadri Berishës që ka ndodhur në vitin 1992 në lagjen Kemnat. Në takimin më të fundit të këshillit të qytetit të Ostfildernit, një përfaqësues i grupit,  bëri thirrje për ngritjen e një memoriali për Berishën, i cili ishte viktimë e një krimi me motive raciste, transmeton albinfo.ch. Iniciativa thekson se kjo është pjesë e kulturës së përkujtimit, e qytetit.

Ende nuk ka plane konkrete për një memorial, tha kryebashkiaku Christof Bolay në mbledhjen e këshillit të qytetit në sallën e bashkisë, shkruan stutgarternachrichten.de. Megjithatë, ai sinjalizoi gatishmërinë e tij për të folur me grupin, i cili tani synon të takohet me kryebashkiakun.

“Gjurmë në kujtesën kolektive”

Vrasja ka ndodhur natën e 8 korrikut 1992, në një banesë të përbashkët për punëtorët jugosllavë të ndërtimit në Kemnat. Sadri Berisha, një punëtor (“Gastarbeiter”) 55-vjeçar shqiptar i Kosovës, ishte viktimë e një sulmi fatal nga neonazistët.  Në të njëjtën kohë, bashkatdhetari i tij 46-vjeçar, Sahit Elezaj, ishte viktimë e një tentative vrasjeje.

Berisha la pas një grua dhe tre fëmijë. “Ky akt ka lënë gjurmë të thella në kujtesën kolektive të qytetit të Ostfildern,” shkruan arkivisti i qytetit Jochen Bender në faqen e internetit të arkivit të qytetit.

Sadri Berisha kishte jetuar dhe punuar në Gjermani për 21 vjet deri në vdekjen e tij të dhunshme. Sipas Bender, ai njihej si një njeri i qetë dhe punëtor dhe punonte për një kompani inxhinierike civile në Ostfildern, përcjell albinfo.ch. Një pjesë e madhe e të ardhurave që fitonte, shkonte për familjen e tij në vendlindje.

Kolegët dhe të njohurit e tij e përshkruanin Berishën si një person miqësor dhe të shoqërueshëm. “Vdekja e tij e papritur dhe tragjike la një boshllëk të thellë në familjen dhe komunitetin e tij”, shkruan arkivisti i qytetit.

Grupi i Mbështetjes së Azilit dhe Iniciativa Kundër Ksenofobisë mblodhën donacione për të mbuluar koston e një nekrologjie dhe për të mbështetur familjen.

Policia e kishte zbardhur krimin brenda 20 orëve. Dy autorët kryesorë nga skena lokale e skinhedëve u nxorën para një gjyqtari së bashku me katër persona të tjerë të përfshirë.

Viktimat

Sadri Berisha lindi më 8 shkurt 1937, në Kryshec (Komuna e Pejës), Kosovë. Ai kishte punuar në Gjermani për 21 vjet dhe konsiderohej një person i qetë dhe paqësor. Ai la pas gruan dhe tre fëmijë.

Sahit Elezaj vjen nga Damjani (komuna e Gjakovës), Kosovë, dhe është babai i shtatë fëmijëve. Familjes së tij iu lejua t’i bashkohej në Gjermani pas sulmit.

Gjyqi para Dhomës së të Miturve të Gjykatës Rajonale të Stuttgartit ishte procesi gjyqësor i parë mbarëkombëtar kundër autorëve të dhunës të motivuar nga ksenofobia, transmeton albinfo.ch. Procedurat zbuluan marrëdhëniet familjare jofunksionale të autorëve dhe konsumin e alkoolit, si dhe kontekstin shoqëror që i mundësoi veprimet e tyre.

Vendimi u dha më 13 maj 1993. Autori kryesor 25-vjeçar mori një burgim të përjetshëm për vrasje të përbashkët dhe tentativë vrasjeje. Një autor 21-vjeçar u dënua me nëntë vjet në paraburgim për të mitur për vrasje dhe tentativë vrasjeje. Dy autorë, të moshës 22 dhe 23 vjeç, morën secili nga shtatë vjet burg për vrasje të paqëllimshme dhe sulm të rënduar.

Një autor 21-vjeçar mori një dënim me kusht prej dy vjetësh. Dy autorë të tjerë, të moshës 20 dhe 31 vjeç, u dënuan me kusht dhe u urdhëruan të paguanin dëmshpërblim.

---