The Guardian: Vedat Muriqi ngrihet në fenomen të La Ligës

Sulmuesi i Mallorcas nga Prizreni po tërheq vëmendje ndërkombëtare pas golit vendimtar ndaj Real Madridit dhe paraqitjeve të tij të jashtëzakonshme në Spanjë.

Gazeta prestigjioze britanike “The Guardian” i ka kushtuar një artikull të gjatë sulmuesit të Mallorcas dhe Kosovës, Vedat Muriqi, duke e cilësuar atë si një nga emrat më në ngritje të La Ligës, përcjell albinfo.ch.

Muriqi, i lindur në vitin 1994 në Prizren, është shndërruar në një nga figurat kryesore të skuadrës së tij, sidomos pas golit vendimtar ndaj Real Madridit, që i dha fitoren Mallorcas me rezultat 2:1. Ky moment ka bërë që ai të përfitojë vëmendje të gjerë ndërkombëtare, duke u përshkruar si një “fenomen global”.

Sipas artikullit të gazetarit Sid Lowe, të publikuar në “The Guardian” me titull “Pirati i Mallorcas e lë mënjanë dhimbjen e Kosovës në plejof për të tronditur Real Madridin”, Muriqi po përjeton një periudhë të rëndësishme në karrierën e tij, e cila ka tërhequr interes të madh nga mediat ndërkombëtare.

Sulmuesi kosovar ka shënuar 19 gola në La Liga, duke u kthyer në një nga pikat kyçe të Mallorcas dhe një emër gjithnjë e më i përmendur në futbollin evropian, krahas yjeve si Kylian Mbappé, Erling Haaland dhe Harry Kane.

Pavarësisht arritjeve në klub, Muriqi ka kaluar edhe momente të vështira, përfshirë dështimin e Kosovës për t’u kualifikuar në Kupën e Botës pas humbjes në plejof ndaj Turqisë, si dhe një penallti të humbur në ndeshjen vendimtare kundër Elches.

Ai ka reflektuar mbi emocionet e tij duke thënë:

“Edhe pse mund të dukem i ashpër dhe i shëmtuar nga jashtë, edhe unë jam njeri.”

Kam vuajtur shumë në javët e fundit”, shtoi ai, dukshëm i dorëzuar, por me një lloj fryme lehtësimi. 

“Papritmas, vjen një gol, një gol fantastik, për të fituar 2:1 me një nga golat e mi. Jam shumë i lumtur për shokët e mi të ekipit dhe për veten time”, shtoi ai.

Sfida e ardhshme e Muriqit tani është të mbajë këmbën në gaz. 

Ndikimi i tij në lojën e Mallorcas është i madh, edhe pse ai ka shënuar më shumë se gjysmën e golave të ekipit (36). Me tetë ndeshje të mbetura, futbollistët e drejtuar nga trajneri, Martin Demichelis, duhet të sigurojnë mbijetesën e tyre sa më shpejt të jetë e mundur, dhe kjo do të jetë më e lehtë nëse sulmuesi i tyre yll është në formë. 

Për më tepër, me 53 gola, ai është vetëm një gol larg barazimit të rekordit historik (54) të vendosur nga kamerunasi Samuel Eto’o si golashënuesi më i mirë i të gjitha kohërave të klubit që garon në La Liga. Po ashtu është tetë gola larg barazimit të rekordit të Dani Guiza për gola të shënuar gjatë një edicioni. Guiza kishte shënuar 27 gola në edicionin 2007/2008.

Ky kombinim i performancës sportive dhe karakterit të tij ka bërë që Muriqi të fitojë respekt të gjerë në Spanjë dhe më gjerë në futbollin evropian./Albinfo.ch

---