Thaçi: Mjaft me raporte, duam liberalizimin e vizave

Presidenti i Kosovës, Hashim Thaçi duke komentuar Raportin e Progresit për Kosovën ka thënë se qytetarët janë lodhur nga raportet e shumta.

Thaçi ka shkruar se Kosova mbetet e përkushtuar për zbatimin e reformave evropiane dhe të Marrëveshjes së Stabilizim Asocimit, përcjell albinfo.ch.

“E përshëndes faktin që ky raport ka reflektuar pozitivisht rreth procesit të përmbushjes së kritereve për liberalizimin e vizave. Prandaj, e konsideroj çështje urgjente që ky proces të mbyllet sa më shpejt nga ana e BE-së, sepse qytetarët e Kosovës janë lodhur nga raportet e shumta. Tani është momenti për diçka konkrete. Liberalizimi i vizave duhet të ndodhë pa humbur kohë”, ka thënë ai.

Presidenti Thaçi ka shkruar se vendi ka vullnet të mjaftueshëm politik për të intensifikuar hapat e saj drejt integrimit në BE. “Kosova ka nevojë të ketë qartësi në rrugën e saj evropiane dhe të trajtohet në mënyrë të barabartë me shtetet tjera të rajonit. Pavarësisht sa e komplikuar mund të jetë një gjë e tillë për BE-në, në mungesë të një perspektive të qartë, gjithçka tjetër mund të sjell komplikime dhe pasoja jo vetëm për Kosovën por edhe gjithë rajonin”, ka shkruar ai në “Facebook”.