Spanjë: Konfiskohen 1.8 tonë methamphetamine të kartelit më të rrezikshëm të Meksikës

Ilustrim

Policia spanjolle ka konfiskuar 1.8 tonë methamphetamine, të cilën një prej karteleve më të frikshme të Meksikos po tentonin ta fusnin në Europë.

Autoritetet në vend kanë arrestuar pesë persona, duke përfshirë edhe kokën e operacionit.

Po ashtu, në pranga është vënë një grua nga Rumania dhe tre spanjollë. Lënda narkotike u zbulua në rajonin Alicante, në lindje të Spanjës.

Kjo është sasia më e madhe e kapur deri më tani e kësaj substance në Spanjë dhe e dyta më e rëndësishme në Europë, sipas policisë spanjolle.

Shtetasi meksikan mes të arrestuarve, sipas autoriteteve, është i lidhur me kartelin e Sinaloa-s. Ai ishte përgjegjës për pritjen e lëndëve narkotike në Spanje dhe më pas dërgimin e tyre në Europë.

Karteli Sinaloa është një nga organizatat kriminale më të vjetra, më të mëdha dhe më të dhunshme të Meksikës, ndikimi i së cilës mbetet i fortë pavarësisht nga arrestimi i themeluesit të tij, Joaquin Guzman, “El Chapo”, ose ai i djalit të tij Ovido, në janar të 2023.

Të dy ishin ekstraduar dhe burgosur në SHBA. Policia konfiskoi po ashtu edhe kartëmonedha dhe dokumente.