Më shumë gra po zgjedhin shërbimin ushtarak zviceran

Por, përqindja e grave në forcat e armatosura zvicerane qëndron në vetëm 0.7%, prapa Gjermanisë (12%) dhe Suedisë (18%)

Derisa Zvicra po mendon për detyrimin ushtarak të grave, më shumë gra janë paraqitur si vullnetare në forcat e armatosura.

Numri i grave në ushtrinë zvicerane është dyfishuar në dy vitet e fundit. Gazeta “Sonntags Blick” raporton se një rekord prej 250 grave janë paraqitur vullnetare për shërbimin ushtarak vitin e kaluar, çka është 35 % më shumë se një vit më parë, dhe praktikisht dyfishin e vitit 2015, shkruan “swissinfo”, përcjell albinfo.ch.

“Interesi për çështjet e sigurisë në mesin e grave është rritur me krizat në Evropë, veçanërisht me Ukrainën”, u shpreh për gazetën, Tibor Szvirçev Tresch, kreu i sociologjisë ushtarake në Institutin Federal të Teknologjisë të Cyrihut (ETH).

Shërbimi ushtarak është vullnetar për gratë në Zvicër dhe ka më shumë se 1,000 që aktualisht shërbejnë, me më shumë se gjysmën e të cilave vazhdojnë trajnimin e oficerëve.

Por, përqindja e grave në forcat e armatosura zvicerane qëndron në vetëm 0.7%, prapa Gjermanisë (12%) dhe Suedisë (18%).

Autoritetet njoftuan verën e kaluar se po e konsiderojnë rekrutimin e femrave përgjatë linjave të modelit norvegjez.