Shqipëria, e 42-ta në botë

Nga rivalët e Grupit A në Euro 2016, Zvicra pozicionohet e 15-ta, Franca e 17-ta, ndërsa Rumania klasifikohet në vendin e 22-të

Kombëtarja shqiptare ka bërë përparim në renditjen e FIFA-s. Tashmë kuqezinjtë renditen në vendin e 42-të, derisa më parë ishin në vendin e 45-të, shkruan albinfo.ch.

Fitorja 3:1 me Katarin i shërbeu Kombëtares shqiptare që të përmirësojë pozitat në renditjen e FIFA-s. Skuadra e Gianni De Biasit ngjiti tre vende, duke lënë poshtë vetes skuadra si Skocia, Paraguai apo edhe Egjiptin.

Tashmë Kombëtarja ka 667 pikë në total, 35 më tepër se muajin e kaluar. Shqipëria përmirësoi pozitat e saj vetëm një javë përpara startit të Euro 2016, ndërsa në periudhën prill-maj, skuadra pozicionohej e 45-ta.

Nga rivalët e Grupit A në Euro 2016, Zvicra pozicionohet e 15-ta, Franca e 17-ta, ndërsa Rumania klasifikohet në vendin e 22-të.

Në krye të renditjes botërore të FIFA-s mbetet Argjentina, që ndiqet si gjithmonë nga Belgjika. Në vendin e tretë është ngjitur Kolumbia, ndërsa pas një pozicioni të fituar Gjermania tashmë klasifikohet e katërta.