Shqipëri: Arrestohet drejtuesi i bandës kriminale, dërgonte drogë në Gjermani

Prokuroria e Posaçme kundër Korrupsionit dhe Krimit të Organizuar në Shqipëri ka bërë të ditur se ka arrestuar drejtuesin e një grupi kriminal, i cili dyshohet se ka trafikuar marihuanë nga Shqipëria dhe Spanja në drejtim të Gjermanisë.

Sipas njoftimit të SPAK, në pranga është vënë shtetasi me iniciale I.S. i cili dyshohet të jetë drejtuesi dhe financuesi i kësaj veprimtarie të paligjshme kriminale.

“Prokuroria e Posaçme kundër Korrupsionit dhe Krimit të Organizuar, bazuar në materialin e referuar nga Oficerët e Policisë Gjyqësore pranë Byrosë Kombëtare të Hetimit, ka regjistruar (kryesisht) procedimin penal me Nr. 150 të vitit 2022, për veprat penale “Trafikimi i lëndëve narkotike” kryer në formën e veçantë të bashkëpunimit atë të grupit të strukturuar kriminal, si dhe veprat penale “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 283/a, 28 pika 4, 333/a dhe 334 të Kodit Penal.

Këto hetime janë realizuar në bashkëpunim të ngushtë me autoritetet gjermane të drejtësisë, strukturat e hetimit të Departamentit të Policisë Kriminale në Policinë e Shtetit, si dhe Byronë Kombëtare të Hetimit, për interesa të të cilave janë ndërmarrë një sërë veprimesh të rëndësishme hetimore.

Nga aktet e administruara për interesa të këtij procedimi penal ka rezultuar se autoritetet gjermane të drejtësisë, e më konkretisht Prokuroria e Braunschweig, ka vijuar me kryerjen e hetimeve ndaj një grupimi në përbërje të të cilit kishte disa shtetas shqiptarë, të cilët, si pjesë e një grupi kriminal, gjatë viteve 2020-2021, kanë importuar në Republikën Federale Gjermane, në disa episode, sasi të konsiderueshme lënde narkotike të llojit marihuanë. Sasia e lëndës narkotike sigurohej kryesisht nga Shqipëria dhe Spanja, e cila pasi futej në territorin gjerman, është tregëtuar në rajonin Wolfsburg-ut, Magdeburg-ut, si dhe në vende të tjera të Bashkimit Evropian.