Shkëndija feston titullin me 35 pikë më shumë se Vardari

Pas 36 ndeshjeve, Shkëndija e mbylli me 29 fitore, 4 barazime dhe vetëm 3 humbje, me 91 pikë në total, plot 35 më shumë se Vardari i vendit të dytë

Shkëndija e Tetovës e mbyll në mënyrën më të mirë të mundshme kampionatin në Ligën e Parë të Maqedonisë, duke fituar thellë 4:0 me Pelisterin në stadiumin e Tetovës.

Të shpallur matematikisht kampionë të Maqedonisë shumë java para fundit, kuqezinjtë tetovarë për kënaqësinë e tifozë të shumë të pranishëm në stadium dominuan edhe ndaj Pelisterit. Në fund të pjesës së parë takimi u zhblokua nga Alimi, ndërsa sapo nisi fraksioni i dytë dyfishoi Junior.

Nuk mund t’i mungonte listës së golashënuesve Ferhan Hasani, që shënua dy herë radhazi në minutat 78 dhe 83 për rezultatin përfundimtar 4:0, përcjell albinfo.ch.

Pas 36 ndeshjeve, Shkëndija e mbylli me 29 fitore, 4 barazime dhe vetëm 3 humbje, me 91 pikë në total, plot 35 më shumë se Vardari i vendit të dytë. Paraqitje e shkëlqyer e Shkëndijës, përkthehet edhe tek golat e shënuar, plot 101, dhe vetëm 27 të pësuar në këto 36 javë kampionati.