SHBA paralajmërojnë Turqinë për bashkëpunimin me Rusinë

Shtetet e Bashkuara kanë dalë me një paralajmërim të hapur ndaj Turqisë, duke i kërkuar të mendohet mirë lidhur me eksportet e kimikateve, mikroçipave dhe produkteve tjera në Rusi, të cilat Moska nga ana e saj mund t’i përdorë në luftën që po zhvillon ndaj Ukrainës.

Gjatë vizitave të tij këtë javë në Ankara e Stamboll, zyrtari i Departamentit amerikan të Thesarit, Brian Nelson, shtoi presionin mbi Turqinë për të tkurrur marrëdhëniet tregtare me rusët.

Në takimet e zhvilluara në Ankara dhe Stamboll, Nelson dhe delegacioni i tij, kanë përmendur eksportet në Rusi që kanë vlerë miliona dollarë.

“Nuk është befasi që Rusia vazhdimisht synon të shfrytëzojë lidhjet historike me Turqinë”, thanë zyrtarët amerikane, duke shtuar se “Pyetja është se si do të përgjigjet Turqia”.

Nelson pati dhe një paralajmërim të hapur, të cilin e përcolli gjatë një fjalimi përpara një grupi bankierësh, ku tha se rritja njëvjeçare e eksporteve drejt Rusisë e vendos Ankaranë në një pozicion “mjaft të cënueshem sa i takon reputacionit të saj, por edhe rrezikut të sanksioneve”, apo humbjes së qasjes në tregjet e G7-tës.

Turqia, vend anëtar i NATO-s, ka qenë kundër sanksioneve të vendosura Moskës, megjithatë ka vazhduar të mbajë raporte të mira Ukrainën e është ofruar vazhdimisht të ndërmjrtësojë arritjen e një marrëveshjeje paqeje mes dy vendeve në konflikt. Perëndimi ka vendosur raunde të vazhdueshme sanksionesh e ka kryer kontrolle të eksporteve drejt Rusisë, që prej fillimit të agresionit rus në Ukrainë, gati një vit më parë.