Shaqiri u kundërpërgjigjet kritikëve

Xherdan Shaqiri ka folur për lëndimet, jetën në Mançester, për Zvicrën, Stoke Cityn dhe synimet për të ardhmen

Në një intervistë të gjatë për ‘Blick’, Xherdan Shaqiri i është përgjigjur të gjitha kritikave në drejtim të tij për shkak të lëndimeve të shumta. Gjithashtu ai ka folur edhe për golat e bukur, Zvicrën e Stoke Cityn, përcjell albinfo.ch.

Ai shënoi një gol të bukur ndaj Bjellorusisë, por jo më i bukuri. “Portieri bjellorus më tha pas ndeshjes se ishte një gjuajtje e pabesueshme, por mendoj se goli gërshërë kundër Polonisë ishte më i bukuri. Kjo edhe për shkak të rëndësisë”, deklaroi ylli shqiptar.

Ai kishte një edicion shumë të vështirë me shumë lëndime. “Është e vështirë për të përshkruar atë që ndodhi. Mjekët folën për mbingarkesat për shkak të bllokimit të muskujve. Unë isha gati dhe tashmë duhet të pushoj prapë”, theksoi tutje ai.

Gjithashtu ka pasur zëra se ka mospajtime me trajnerin Mark Hughes. “Kjo është e pakuptimtë. Kurrë nuk kam pasur problem”.

Kishte edhe akuza për mënyrën e jetesës së tij. “Këto janë akuza të pakuptimta. Unë jetoj në Mançester dhe ju nuk mund t’i ikni paparacëve. Kam punësuar një trajner fizik dhe një psikoterapist nga Gjermania. Ata më kanë ndihmuar shumë. Gjithashtu stafi mjekësor në Stoke është shumë cilësorë. Kanë tetë fizioterapistë. Është e pabesueshme”, shprehet ylli shqiptar.

Ai ka shtuar se është i lumtur në Stoke dhe të ardhmen e mendon në skuadrën angleze.

Shaqiri gjithashtu ka folur edhe për ndeshjen ndaj Ishujve Faroe. Takim që do të luhet në terren artificial. “Kjo është e natyrshme për një ishull. Ne jemi të motivuar për fitore. Kurrë nuk kam qenë atje. E di se ka shumë peshkatarë dhe dele. Është bukur, por ne lojtarët nuk mund ta shijojmë. Ekipet nga ishujt janë duke përparuar shumë. Synimi ynë është të shkojmë në Kampionatin Botëror”, theksoi ndër të tjera Xherdan Shaqiri.