Sërish “sulmon” diarrea: 90 ushtarë zviceranë të sëmurë

“Ushtarët e prekur ndodhen aktualisht në stacionin spitalor, në kazermë dhe nuk bëhet fjalë për raste të rënda”

Ende nuk ka kaluar as një muaj nga “sulmi” i fundit i diarresë (barkqitjes) në një kazermë të ushtrisë zvicerane, ndërsa dje dhe sot sërish një kazermë tjetër është ballafaquar me problemin e njëjtë.

90 pjesëtarë të shkollës së policisë ushtarake në kazermën e Sionit, Kantoni Valis po përballen me diarrenë. Zëdhënësi i Armatës, Daniel Rist e ka konfirmuar lajmin e publikuar në blick por nuk ka dhënë detaje se në çfarë shkalle është zhvilluar sëmundja dhe cilët janë shkaktarët e saj.

“Ushtarët e prekur ndodhen aktualisht në stacionin spitalor, në kazermë dhe nuk bëhet fjalë për raste të rënda”, ka thënë Rist për 20minuten.ch. Ai thotë se nuk mund të përjashtohet infektimi viral. “Aktualisht po analizohen mostrat nga ana medicinale”, përcjell albinfo.ch.

Zëdhënësi në fjalë po ashtu nuk mund të thotë nëse ushtarët janë sëmurë nga ushqimi i kontaminuar ose problemet mund të kenë ardhur nga kuzhina e kazermës për shkak të temperaturave të larta.

Një rekrut i stacionuar prej pesë javësh në kazermën në fjalë në Sion ka thënë për gazetën: “Për fat ne që ditëve të fundit kemi ngrënë jashtë kazermës, ushqim nga konservat, kemi shpëtuar”, trasnmeton albinfo.ch. Por ai thotë se nuk mund të ankohet për cilësinë e ushqimit në kazermë.

---