Serbët kërkojnë heqjen e flamurit të Kosovës, largohen të gjithë flamujt

Përfaqësuesit e Parlamentit të Serbisë gjatë një takimi përfaqësuesish të vendeve të rajonit në Kuvendin e Maqedonisë, kërkuan heqjen e flamurit të Kosovës nga platforma ku qëndronin flamujt e shteteve anëtare të BE-së, si dhe vendeve të Ballkanit.

Deputetët nga Kosova (deputetja Blerta Deliu) reaguan duke adresuar kritika, ndërsa krejt në fund u vendos që të largohen gjithë flamujt, raporton ‘Alsat-M’.

Bëhet fjalë për delegacionin e Komisionit për Integrime Evropiane të Kuvendit të Kosovës, i cili dje mori pjesë në Konferencën e 13-të të komisioneve për integrime/çështje evropiane të shteteve pjesëmarrëse në Procesin e Stabilizimit dhe Asociimit të Evropës Juglindore – COSAP, që u mbajt në Shkup, përcjell albinfo.ch.

Delegacioni i Kosovës përbëhej nga deputetët Blerta Deliu-Kodra, kryetare e Komisionit, Armend Zemaj, zëvendëskryetar i Komisionit dhe Fikrim Damka – zëvendëskryetar i Komisionit.

“Delegacioni i Serbisë i është drejtuar sekretariatit të konferencës në lidhje me praninë e flamurit të Republikës së Kosovës, i cili po ashtu ishte vendosur këtu, pas çka sekretariati i largoi të gjithë flamujt e të gjitha vendeve pjesëmarrëse në konferencë dhe në këtë mënyrë u zgjidh kjo situatë sipas kërkesës së tyre.

Sipas gjykimit tim kjo është e palogjikshme duke marrë parasysh atë që tha edhe z. Vajgëll në konferencë se një ditë edhe Serbia, por edhe Kosova, do të bëhen vende anëtare të BE-së”, deklaroi Artan Grubi, deputet i BDI-së në Kuvendin e Maqedonisë.